മുഖവുര

ആരും എഴുത്തുകാരായി ജനിക്കുന്നില്ല. അധികമാരും എഴുത്തുകാരാകുന്നുമില്ല. എന്താണിതിനു കാരണമെന്ന്‌ അന്വേഷിച്ച എനിക്ക്‌ ഈ ഉത്തരമേ ലഭിച്ചുള്ളൂ: എഴുത്ത്‌ ഒരു കലയാണ്‌
(ഇതാര്‍ക്കാണറിയാത്തത്‌?)

കലയ്ക്ക്‌ ഒരു സമവാക്യമുണ്ട്‌:
കല = കഴിവ്‌ + കരവിരുത്‌
(ഇതും അറിയാം മാഷേ...)
അറിയാമെങ്കി എഴുതരുതോ...?

കഴിവ്‌ ഇല്ല അല്ലേ? ആരുപറഞ്ഞു ഇല്ലെന്ന്‌? നിങ്ങളുടെ കഴിവുകളെയും സാദ്ധ്യതകളെയും കുറിച്ച്‌ ഇരുത്തി ചിന്തിക്കാന്‍ സമയമായിരിക്കുന്നു. കഥയെഴുതാന്‍ കഴിവില്ലെങ്കിലും കവിതയെഴുതാന്‍ കഴിഞ്ഞേക്കും. ഒരുപക്ഷേ ലേഖനം അഥവാ നിരൂപണം ആയിരിക്കും നിങ്ങളുടെ കഴിവ്‌ തെളിയിക്കുന്നത്‌. കാമുകിയോ കാമുകനോ ആവാന്‍ കഴിവില്ലാത്തവര്‍ നല്ലൊരു ഭാര്യയോ ഭര്‍ത്താവോ രക്ഷിതാവോ ആയിക്കൂടെന്നില്ലല്ലോ?

കരവിരുത്‌ പരിശീലിച്ചെടുക്കാവുന്നതാണ്‌. എഴുത്ത്‌ കലയുടെ സമവാക്യത്തിലെ ഈ ഭാഗം എഴുതിത്തന്നെ തെളിയിക്കാം. മറ്റ്‌ എഴുത്തുകാരുടെ കൃതികള്‍ വായിക്കുന്നതും അവരെങ്ങനെ എഴുതുന്നു എന്ന്‌ അറിയുന്നതും സഹായകമാവും (കോപ്പിയടിയല്ല ഉദ്ധേശിച്ചത്‌). എന്നാല്‍ അറിഞ്ഞിരിക്കേണ്ട സാധാരണ തത്ത്വങ്ങളുണ്ട്‌, അവ വരും നാളുകളില്‍ എന്നാലാവും വിധം ഇവിടെ വിവരിക്കാം.

"ഇതൊക്കെ എഴുതാന്‍ മാത്രം ഇവനാരെടാ?" എന്നാവും...

കഥയില്‍ ചോദ്യമില്ല കൂട്ടരേ... :)